اۉقوو
طالبلردن ینگی تهدید: «آغزینگیزنی یاپینگ، بیزگه قرشی گپیرمنگ»
طالبلر تامانیدن اهالیگه و مخالفلرگه قرشی باسیملر کوچه‌ییب باره‌یاتگن بیر پیتده، اوشبو گروه نینگ یوقاری مرتبه‌لی عملدارلریدن بیری ینه بیر بار اهالینی آچیقچه‌سیگه تهدید قیلدی.
طالبلر تامانیدن اهالیگه و مخالفلرگه قرشی باسیملر کوچه‌ییب باره‌یاتگن بیر پیتده، اوشبو گروه نینگ یوقاری مرتبه‌لی عملدارلریدن بیری ینه بیر بار اهالینی آچیقچه‌سیگه تهدید قیلدی. طالبلر نینگ مهاجرلر وزیری و سابق سیاسي باش وزیر اۉرین‌باسری عبدالکبیر خوست، پکتیا و پکتیکا ولایتلری اهالیسی بیلن اوچره‌شووده طالبلرگه قرشی هېچ کیمگه «نه تاغده، نه دشتده و نه کۉچه‌ده» گپیریشگه رخصت بېریلمسلیگینی ایتدی.عبدالکبیر محلي اهالیدن طالبلرگه قرشی فکر بیلدیره‌یاتگن شخصلر نینگ آلدینی آلیشنی طلب قیلیب، بو گروه هر قنده‌ی تنقید و مخالفتنی قطعا باستیریشینی تاکیدله‌دی. اوشبو بیانات طالبلر سۉنگگی تۉرت ییلدن آرتیق وقت دوامیده سۉز اېرکینلیگی، مستقل ژورنالیزم و تینچ ناراضیلیکلرنی تیزیملی روشده تعقیقلب کېله‌یاتگن بیر شرایطده ینگره‌ماقده.شو بیلن بیرگه، ژورنالیستیک تشکیلاتلر، سیاسي مخالفلر و عادي اهالی طالبلر خلق نینگ دردینی اېشیتیش اۉرنیگه مطلق دیکتاتورلیک سیاستینی یوریته‌یاتگنینی اَیتماقده. اولر نینگ تاکیدلشیچه، آخرگی ییللرده اۉنلب ژورنالیستلر، مدنی فعاللر و ناراضیلیک بیلدیرگن عیاللر حبسگه آلینگن، قماققه تشلنگن و زوراوانلیککه اوچره‌گن.افغانستان ژورنالیستلرینی حمایه قیلیش تشکیلاتی رهبری حامد عابدي اۉزبېک-پېدیا بیلن صحبتده بو کبی تهدیدلر ینگیلیک اېمسلیگینی ایته‌دی. اونینگ سۉزلریگه کۉره، طالبلر سۉز اېرکینلیگیگه ایشانمه‌یدی و برچه میدیا فعالیتلری کېسکین سانسور آستیده. «افغانستانده چاپ اېتیله‌یاتگن برچه اخبارات، حتا تشقی تاماندن اېرکین کۉرینگن میدیالر هم طالبلر سیاستیگه ماسلب فلترلنه‌دی. نتیجه‌ده فقط طالبلر نینگ فعالیتلری ترقه‌تیله‌دی»، – دېیدی او.سابق دیپلومات فیض الدین غیاثی اېسه طالبلرنی متعصب و اصلاح بۉلمه‌یدیگن گروه دېب اته‌یدی. اونینگ فکریچه، طالبلر تشکیل تاپگنیدن بېری اېرکین فکر و مخالفتنی باستیریب کېلماقده. او قید اېتیشیچه، طالبلر حاکمیتگه قَیتگچ، کۉپلب ژورنالیستلر، عیاللر نمایشچیلر و انسان حقوقلری فعاللری قماققه آلینگن، اَیریم حاللرده اېسه اۉلدیریلگن.بعضی کیشیلر اېسه طالبلر نینگ بونده‌ی تهدیدلرینی خلق ناراضیلیگیدن قۉرقوو بېلگیسی دېب بهاله‌ماقده. اولر نینگ ایتیشیچه، دیکتاتورلیک قیسقه مدتده ثمره‌لی کۉرینسه-ده، جمعیتده تۉپلنگن ناراضیلیک آخر-عاقبت کېسکین پارتلشگه آلیب کېله‌دی.اوّلراق طالبلر نینگ عدلیه وزیری عبدالحکیم شرعی برچه سیاسي حزبلر فعالیتینی تعقیقلب، اولر نینگ نامینی تیلگه آلیشنی جنایت دېب اعلان قیلگن اېدی. طالبلر سۉنگگی ییللرده برچه ناراضیلیک حرکتلرینی تعقیقلب، اینیقسه عیاللر ناراضیلیکلرینی شفقتسیزلرچه باستیریب کېلماقده.افغانستان ژورنالیستلر مرکزی و 8-صبح گزېته‌سی حساباتلریگه کۉره، طالبلر سانسور، مجبوري «اقرار»، ژورنالیستلرگه تهدید و حبسلر آرقه‌لی مملکتده قۉرقوو و سکونت محیطینی کوچه‌یتیرگن.
یازووچی: محمدفهیم عظیمی. ترجمه: آیبیک
جمعیت بحثی
هنوز ایزاح یوُق
بیرینچی بؤلیب فکرینگیزنی یازینگ.