مولونا لطفي هروي خاطره‌سیگه بغیشلنگن مراسم منچستېرده اۉتکزیلدی

انگلستان نینگ منچستېر شهریده بویوک شاعر و متفکر مولانا لطفي هروي خاطره‌سینی یاد اېتیش مراسمی بۉلیب اۉتدی. تدبیر ادبي دوره‌ تشبثکاری، مدنی فعال شفیع بېگ اۉغلی نینگ اوییده تشکیل قیلینیب، شهرده استقامت قیلووچی افغانستان لیک مهاجرلر، شاعر و یازووچیلر همده‌ مدنی فعاللری قتنه‌شدیلر.مراسمده آنلاین طرزده اشتراک اېتگن یازووچی و ادبیاتشناس سید محمد عالِم لبیب مولانا لطفي نینگ حیاتی، علمي میراثی و ایجادي فعالیتی حقیده کېنگ معلومات بېردی. او، خصوصاً، لطفي ایجادی نینگ نوایي ادبي مکتبیگه تأثیری، شونینگدېک، اونینگ تورکي خلقلر ادبیاتیده توتگن اۉرنی حقیده سۉز یوریتدی.ییغینده قتنشوچیلر مهاجرلیک شرایطیده بونده‌ی ادبي اوچره‌شوولر نینگ اهمیتینی علیحده‌ تأکیدلب، یاش اولادنی کلاسیک ادبیات میراثی بیلن تنیشتیریش ضرورلیگینی قید اېتدیلر.تدبیر دوامیده‌ بیر گروه یاشلر لطفي هروي نینگ شعرلریدن نمونه‌لر اۉقیب، مراسمگه بدیعي روح بغیشله‌دیلر.تدبیر یکونیده تشبثکار شفیع بېگ اۉغلی سۉزگه چیقیب، ییغیلیش قتنشوچیلریگه منّتدارلیک بیلدیردی همده‌ کېلگوسیده هم بونده‌ی ادبي دوره‌لرنی منتظم اۉتکزیش نیتینی اظهار اېتدی. مولونا لطفي هروي کیم اېدی؟ مولونا لطفي هروي هجري توقیزینچی عصرده افغانستان نینگ هرات ولایتیده‌گی ده‌کنار قیشلاغیده توغیلگن. او مشهد و هرات مدرسه‌لریده علم آلیب، شاهرخ میرزا، اولوغب ېک میرزا و بایسنقر میرزالر سراییده خدمت قیلگن.لطفي اۉز اثرلرینی اۉزبېک و دری تیللریده یره‌تگن. شعریتی بدیعي سویه‌سی و معنوي چوقورلیگی بیلن علیحده‌ اجره‌لیب توره‌دی. بویوک متفکر علیشېر نوايی اونی «ملک ل کلام» – «سۉز ملکی نینگ سلطانی» لقبی بیلن اعزازله‌گن. لطفي هراوي نینگ شعرلری بوگونگی کونده‌ هم تورکي خلقلر آره‌سیده سېویب اۉقیله‌دی.مولانا لطفي هروي 99 یاشیده هراتده وفات اېتگن